ಟೊಮ್ಯಾಟೊ ಬೆಳೆ ಲಾಭದಾಯಕವಾಗಿಸೋದು ಹೇಗೆ? – ಟೊಮ್ಯಾಟೊ ಕೃಷಿಗೆ ಸಂಬಂಧಿಸಿದ ಉಪಯುಕ್ತ ಮಾಹಿತಿ ಇಲ್ಲಿದೆ…

ಕೃಷಿ‌ ಲೋಕ : ಈರುಳ್ಳಿ ಮತ್ತು ಆಲೂಗೆಡ್ಡೆ ನಂತರ ಭಾರತದಲ್ಲಿ ಅತಿ ಹೆಚ್ಚು ಉತ್ಪಾದಿಸುವ 3ನೇ ಬೆಳೆ ಟೊಮಾಟೊ ಆಗಿದೆ. ಟೊಮಾಟೊ ಸೋಲನೇಸಿ ಕುಟುಂಬಕ್ಕೆ ಸೇರಿದ ಒಂದು ಗಿಡ. ಇದು ಅಲ್ಪಾಯುಶಿ ಗಿಡ – ವರ್ಷಕ್ಕೊಮ್ಮೆ ಬೆಳೆಯಲಾಗುತ್ತದೆ. ಬೇಸಿಗೆ ಕಾಲ ಟೊಮೆಟೊ ಬೆಳಯಲು ಉತ್ತಮ ಹವಾಮಾನವಾಗಿದೆ. ಆದರೆ ಭಾರತದಲ್ಲಿ ವರ್ಷ ಪೂರ್ತಿ ಟೊಮೆಟೊ ಕೃಷಿ ಮಾಡಲಾಗುತ್ತದೆ. 1 -3 ಮೀ ಎತ್ತರ ಬೆಳೆಯುವ ಈ ಗಿಡ ತೆಳು ಕಾಂಡವನ್ನು ಹೊಂದಿದ್ದು ಉಳಿದ ಗಿಡಗಳ ಮೇಲೆ ಸುಲಭವಾಗಿ ಹರಡಿಕೊಳ್ಳುತ್ತದೆ.

ಇದರ ಎಲೆಗಳು 10-25 ಸೆ ಮೀ ಉದ್ದವಿದ್ದು, ಎಲೆಗಳ ಮಧ್ಯೆ ತೆಲು ಪದರಗಳಿದ್ದು, 8 ಸೆ ಮೀ ನಷ್ಟು ಅಗಲವುಳ್ಳ 5 – 9 ಎಲೆಗಳ ಗುಂಪಿನಂತೆ ಕಾಣಸಿಗುತ್ತವೆ. ದಕ್ಷಿಣ ಮೆಕ್ಸಿಕೊದಲ್ಲಿ ೧೬ನೇ ಶತಮಾನದಲ್ಲಿ ಇದನ್ನು ಬೆಳೆಸುತ್ತಿದ್ದರಂತೆ. ಹೃದಯದ ರಕ್ತ ನಾಳದಲ್ಲಿರುವ ಕೊಬ್ಬು ನಿವಾರಣೆಗೆ ಟೊಮೆಟೋ ಸಾರದ ಮಾತ್ರೆ ಉಪಯೋಗಕರ.

ಭಾರತದಲ್ಲಿ ಆಂದ್ರ ಪ್ರದೇಶ, ಕರ್ನಾಟಕ, ಒರಿಸ್ಸಾ, ಮಹಾರಾಷ್ಟ್ರ, ಪಶ್ಚಿಮ ಬಂಗಾಳ, ತಮಿಳುನಾಡು ಸೇರಿದಂತೆ ಹಲವು ರಾಜ್ಯಗಳಲ್ಲಿ ಟೊಮೆಟೊ ಬೆಳೆಯಲಾಗುತ್ತದೆ.

ಅಡುಗೆಗೆ ಮಾತ್ರವಲ್ಲದೇ ಹಲವಾರು ಔಷಧೀಯ ಗುಣಗಳನ್ನು ಹೊಂದಿರುವ ಕಾರಣ, ಟೊಮೆಟೊಗೆ ಎಲ್ಲಾ ಕಾಲದಲ್ಲಿಯೂ ಬೇಡಿಕೆ ಇದ್ದದ್ದೇ. ಹೀಗೆ ಬಹು ಬೇಡಿಕೆಯಿರುವ ಟೊಮೆಟೊ ಕೃಷಿ ವಿಧಾನದ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಟೊಮೆಟೊವನ್ನು ಬೇಸಿಗೆಯಲ್ಲಿ, ಆಳವಾಗಿ ಉಳುಮೆ ಮಾಡಬೇಕು. ಈ ರೀತಿ ಮಾಡುವುದರಿಂದ ಮಣ್ಣಿನಲ್ಲಿ ಹುದುಗಿರುವ ಹುಳುಗಳು, ಕೋಶಾವಸ್ಥೆಯ ಕೀಟಗಳು ಸಹ ಮೇಲೆ ಬರುತ್ತವೆ. ಇವುಗಳನ್ನು ಕೀಟ ಭಕ್ಷಕ ಪಕ್ಷಿಗಳು ಹೆಕ್ಕಿ ತಿನ್ನುತ್ತವೆ ಮತ್ತು ಸೂರ್ಯನ ಬಿಸಿಲಿನ ಶಾಖದಿಂದಲೂ ಹುಳುಗಳು ಸಾಯುತ್ತವೆ. ಗಿಡಗಳ ಮೇಲೆ ಕಾಣುವ ಕೀಟಗಳನ್ನು ಹಿಡಿದು ನಾಶಪಡಿಸುವುದು.

ಈ ಕೀಟಗಳು ಎಲೆಯ ಕೆಳಭಾಗದಲ್ಲಿ ಹೂಗಳ ಹತ್ತಿರ ಇಡುವ ಮೊಟ್ಟೆಗಳನ್ನು ಗುರುತಿಸಿ ನಾಶಪಡಿಸುವುದು. ಟೊಮೆಟೊ ಸುತ್ತ ಅಡೆ ಸಾಲು ಬೆಳೆಯಾಗಿ ಹರಳು ಅಥವಾ ತಂಬಾಕು ಅಥವಾ ಮುಸುಕಿನ ಜೋಳ ಅಥವಾ ಸೇವಂತಿಗೆ ಹೂ ಬೆಳೆದರೆ, ಈ ಕೀಟಗಳು ಹರಳು ಅಥವಾ ಸೇವಂತಿಗೆ ಹೂ ಗಿಡಗಳಿಗೆ ಹೆಚ್ಚು ಆಕರ್ಷಿತವಾಗುತ್ತದೆ ಮತ್ತು ಟೊಮೆಟೊ ಬೆಳೆಗೆ ಹಾನಿ ಕಡಿಮೆಯಾಗುತ್ತದೆ.

ಟೊಮಾಟೊ ಬೀಜವನ್ನು ತಂದು 25 ದಿನಗಳ ಕಾಲ ನರ್ಸರಿಯಲ್ಲಿ ಬೆಳೆಸಿದ ನಂತರ ನಾಟಿ ಮಾಡಬೇಕು.ಸಾಲಿನಿಂದ ಸಾಲಿಗೆ ನಾಲ್ಕು ಅಡಿಗಳ ಅಂತರವಿರಬೇಕು. ಗಿಡದಿಂದ ಗಿಡಕ್ಕೆ 2 ಅಡಿಗಳ ಅಂತರದಂತೆ ಒಂದು ಎಕರೆಯಲ್ಲಿ ಅಂದಾಜು 6 ಸಾವಿರ ಗಿಡಗಳನ್ನು ನಾಟಿ ಮಾಡಬೇಕು. ಕರ್ನಾಟಕದ ಚಿಕ್ಕಬಳ್ಳಾಪುರ, ಚಿಂತಾಮಣಿ, ದೇವನಹಳ್ಳಿ, ಹೊಸಕೋಟೆ, ಮಾಲೂರು, ಬಂಗಾರಪೇಟೆ, ಕೆ.ಜಿ.ಎಫ್, ಕೋಲಾರ, ಬೆಂಗಳೂರು ಗ್ರಾಮಾಂತರ ತಾಲ್ಲೂಕಿನ ಹಳ್ಳಿಗಳಲ್ಲಿ ಟೊಮಾಟೊ ಬೆಳೆಯಲಾಗುತ್ತದೆ. ಹನಿ ನೀರಾವರಿ ಟೊಮಾಟೊ ಬೆಳೆಗೆ ಉತ್ತಮ ಪದ್ದತಿಯಾಗಿದೆ.

ಸಾರಜನಕಯುಕ್ತ (ಯೂರಿಯಾ) ರಸಗೊಬ್ಬರದ ಬಳಕೆ ಕಡಿಮೆ ಮಾಡಬೇಕು. ಸಾರಜನಕ ಹೆಚ್ಚಾದರೆ, ಗಿಡಗಳು ದಟ್ಟವಾಗಿ ಬೆಳೆದು ಕೀಟಗಳಿಗೆ ಉತ್ತಮ ಆಹಾರವಾಗುತ್ತದೆ. ಟ್ರೈಕೋಗ್ರಾಮ ಎಂಬ ಪರಾವಲಂಬಿ ದುಂಬಿಗಳು ಟ್ರೈಕೋಕಾರ್ಡ್ ರೂಪದಲ್ಲಿ ಮಾರುಕಟ್ಟೆಯಲ್ಲಿ ಲಭ್ಯ, ಇವುಗಳನ್ನು ಎಕರೆಗೆ 1.5 ಸೀ. ಸೀ. ಕಾರ್ಡ್‌ಗಳನ್ನು ಗಿಡಗಳಿಗೆ ಕಟ್ಟಬಹುದು.

ನ್ಯೂಕ್ಲಿಯರ್ ಪಾಲಿ ಹೈಡ್ರೋಸಿಸ್ ವೈರಸ್‌ ಅನ್ನು ಶೇ 2ರಷ್ಟು ಹಾಕಬೇಕು. ಇದು ಮಾರುಕಟ್ಟೆಯಲ್ಲಿ ಲಭ್ಯ. ಪ್ರತಿ ಲೀಟರ್ ನೀರಿಗೆ 1 ಮೀ.ಲೀ. ಬೆರೆಸಿ ಸಿಂಪಡಿಸಬಹುದು.ಬೇವಿನ ಬೀಜಗಳನ್ನು ನೆನೆಸಿದ ದ್ರಾವಣ ಅಥವಾ ಬೇವಿನ ಎಣ್ಣೆ 5–10 ಮೀ.ಲೀ. ಅನ್ನು ಪ್ರತಿ ಲೀಟರ್ ನೀರಿಗೆ ಬೆರೆಸಿ ಸಿಂಪಡಿಸಿದರೇ ಕೀಟ ನಾಶವಾಗುತ್ತದೆ.

ಮಣ್ಣು ಮತ್ತು ವಾಯುಗುಣ

ಟೊಮೇಟೋ ಬೇಸಿಗೆ ಕಾಲದ ಬೆಳೆಯಾಗಿದ್ದು, 20-230 ಸೆ. ಸರಾಸರಿ ಮಾಸಿಕ ಉಷ್ಣಾಂಶ ಇದ್ದಲ್ಲಿ ಉತ್ತಮವಾಗಿ ಬೆಳೆಯುತ್ತದೆ. ತಾಪಮಾನ ಮತ್ತು ಬೆಳಕಿನ ಪ್ರಮಾಣ ಮಿಡಿಕಚ್ಚುವಿಕೆ, ಬಣ್ಣ ಮತ್ತು ಪೌಷ್ಟಿಕತೆಯ ಮೇಲೆ ಪ್ರಭಾವ ಬೀರುತ್ತದೆ. ಬೆಳವಣಿಗೆ ಮತ್ತು ಫಸಲಿನ ಮೇಲೆ ದೀರ್ಘ ಒಣ ವಾತಾವರಣ, ಅಧಿಕ ಮಳೆ ಪ್ರತಿಕೂಲ ಪರಿಣಾಮ ಬೀರುತ್ತದೆ.

ಮರಳು ಮಿಶ್ರಿತ ಮಣ್ಣು ಮತ್ತು ಜೇಡಿಮಣ್ಣಿನಂತ ಎಲ್ಲಾ ರೀತಿಯ ಮಣ್ಣಿನಲ್ಲಿ ಟೊಮೇಟೋವನ್ನು ಬೇಸಾಯ ಮಾಡಬಹುದು. ಅಲ್ಪಾವಧಿ ಬೆಳೆಗೆ ಮರಳು ಮಿಶ್ರಿತ ಮಣ್ಣು ಸೂಕ್ತ. ಆದರೆ ಅಧಿಕ ಇಳುವರಿ ಕೊಡುವ ತಳಿಗಳಿಗೆ ಜೇಡಿ ಮತ್ತು ಗೋಡು ಮಣ್ಣು ಸೂಕ್ತವಾಗಿದೆ. ಮಣ್ಣಿನ ರಸಸಾರ 6.0 ರಿಂದ 7.0 ಇದ್ದರೆ ಉತ್ತಮ ಪಲಿತಾಂಶ ಸಿಗುತ್ತದೆ. ಮಣ್ಣು ಆಮ್ಲೀಯವಾಗಿದ್ದರೆ ಸುಣ್ಣ ಉಪಯೋಗಿಸಬೇಕು.

ಜಮೀನು ತಯಾರಿ

ಜಮೀನನ್ನು 2-3 ಸಲ ಚೆನ್ನಾಗಿ ಉಳುಮೆ ಮಾಡಿ ಅಥವಾ ಅಗೆದು ಪುಡಿಯಾಗಿಸಿ ಹದಮಾಡಬೇಕು. ಕಡೆಯ ಬಾರಿ ಉಳುಮೆ ಮಾಡುವಾಗ ಒಂದು ಹೆಕ್ಟೇರು ಜಮೀನಿಗೆ 10 ಕೆ.ಜಿ.ಕಾರ್ಬೊಪ್ಯೂರಾನ್ ಹರಳು ಅಥವಾ 200 ಕೆ.ಜಿ. ಬೇವಿನ ಹಿಂಡಿ ಮತ್ತು ಕೊಟ್ಟಿಗೆ ಗೊಬ್ಬರವನ್ನು ಹರಡಬೇಕು.

ಗೊಬ್ಬರ

ಒಂದು ಹೆಕ್ಟೇರು ಜಮೀನಿಗೆ 20-25 ಟನ್ ಚೆನ್ನಾಗಿ ಕೊಳೆತ ಕೊಟ್ಟಿಗೆ ಗೊಬ್ಬರ/ಸಾವಯವ ಗೊಬ್ಬರ ಉಳುಮೆ ಸಮಯದಲ್ಲಿ ಹರಡಿ ಮಣ್ಣಿನೊಂದಿಗೆ ಮಿಶ್ರಣ ಮಾಡಬೇಕು. ಮೂಲ ಗೊಬ್ಬರವಾಗಿ 75:40:25 ಕೆ.ಜಿ ಸಾರಜನಕ, ರಂಜಕ ಮತ್ತು ಪೊಟಾಷ್‌ನ್ನು ಸಹ ಪ್ರತೀ ಹೆಕ್ಟೇರು ಜಮೀನಿಗೆ ಕೊಡಬೇಕು. 1/2 ಸಾರಜನಕ, ಪೂರ್ತಿ ರಂಜಕ ಮತ್ತು ಅರ್ಧ ಪೊಟಾಷನ್ನು ಗಿಡ ನೆಡುವ ಮೊದಲೆ ಬಳಸಬೇಕು. ಕಾಲುಭಾಗ ಸಾರಜನಕ ಮತ್ತು ಉಳಿದ ಅರ್ಧ ಪೊಟಾಷನ್ನು ನಾಟಿ ಮಾಡಿದ 20-30 ದಿನಗಳಲ್ಲಿ ಮತ್ತು ಉಳಿದ ರಸಗೊಬ್ಬರವನ್ನು ನಾಟಿ ಮಾಡಿದ 2 ತಿಂಗಳ ನಂತರ ಗಿಡಗಳಿಗೆ ಕೊಡಬೇಕು.

ನಾಟಿ ವಿಧಾನ

ಲಭ್ಯವಿರುವ ನೀರಾವರಿಯ ವ್ಯವಸ್ಥೆಯನ್ನು ಅನುಸರಿಸಿ ಸಸಿಗಳನ್ನು ಸಮತಟ್ಟಾದ ಚಿಕ್ಕ ಪಾತಿಗಳಲ್ಲಿ ಅಥವಾ ಆಳವಿಲ್ಲದ ಸಾಲುಗಳಲ್ಲಿ ನೆಡಲಾಗುವುದು. ಮಳೆಗಾಲದಲ್ಲಿ ಮತ್ತು ಜೇಡಿಮಣ್ಣಿನಲ್ಲಿ ಸಸಿಗಳನ್ನು ಸಾಲುಗಳ ಬದಿಯಲ್ಲಿ ನೆಡಲಾಗುವುದು. ಮಧ್ಯಮ ಗಾತ್ರದ ಮತ್ತು ಸಂಕರ ತಳಿಯ ಗಿಡಗಳಿಗೆ 2 ಮೀ ಉದ್ದದ ಬಿದಿರು ಕಡ್ಡಿಯಿಂದ ಆಧಾರ ಒದಗಿಸಬೇಕು ಅಥವಾ 90 ಸೆ.ಮೀ. ಅಗಲದ 15 ಸೆ.ಮೀ. ಆಳದ ಸಾಲುಗಳ ಬದಿಯಲ್ಲಿ ನಾಟಿ ಮಾಡಬೇಕು.

ಪ್ರತೀ ಸಾಲುಗಳಿಗೆ 30 ಸೆ.ಮೀ. ಅಂತರವಿಟ್ಟು ಬೆಳೆದ ಗಿಡಗಳನ್ನು ಅಗಲವಾದ ಸಾಲಿನ ಬದುಗಳಲ್ಲಿ ಹರಿಯಲು ಬಿಡಲಾಗುವುದು. ಚಳಿಗಾಲದಲ್ಲಿ ಗಿಡಗಳನ್ನು 75 x 60 ಸೆ.ಮೀ ಅಂತರವಿಟ್ಟು ನೆಟ್ಟರೆ ಬೇಸಿಗೆಯ ಬೆಳೆಗೆ 75×45 .De. ಅಂತರ ಕೊಡಬೇಕು.

ನೀರಾವರಿ

ಟೊಮೇಟೋ ಬೆಳೆಗೆ ಸರಿಯಾದ ಸಮಯದಲ್ಲಿ ಅವಶ್ಯವಿದ್ದಷ್ಟು ಮಾತ್ರ ನೀರನ್ನು ಎಚ್ಚರಿಕೆಯಿಂದ ಹಾಕಬೇಕು. ಬೇಸಿಗೆಯಲ್ಲಿ 5-7 ದಿನಗಳಿಗೊಮ್ಮೆ ನೀರು ಹಾಯಿಸಬೇಕು. ಚಳಿಗಾಲದಲ್ಲಾದರೆ 10-15 ದಿನಗಳಿಗೊಮ್ಮೆ ನೀರಿನ ಅವಶ್ಯಕತೆಯಿದೆ. ಕಾಯಿ ಕಟ್ಟುವ ಸಮಯದಲ್ಲಿ ದೀರ್ಘ ಒಣ ವಾತಾವರಣದ ನಂತರ ಅಧಿಕ ಮಳೆಯಾದರೆ ಹಣ್ಣು ಬಿರಿದು ಹಾಳಾಗುತ್ತದೆ.

ಕೀಟ ಬಾಧೆ ಮತ್ತು ಪರಿಹಾರ

ತಂಬಾಕು ಎಲೆ ತಿನ್ನುವ ಹುಳು ಟೊಮಾಟೊ ಗಿಡವನ್ನು ಕಾಡುತ್ತದೆ. ಕಡು ಹಸಿರು ಬಣ್ಣದ ದೇಹ ಕಂದು ಮಚ್ಚೆಗಳಿಂದ ಕೂಡಿರುತ್ತದೆ. ಗಿಡದ ಮೊಗ್ಗು, ಹೂಗಳನ್ನು ತಿನ್ನುತ್ತವೆ ಈ ಹುಳು. ಕಾಯಿ ಕಟ್ಟುತ್ತಿದ್ದಂತೆ ಕಾಯಿಯ ಮೇಲೆ ದಾಳಿಮಾಡುತ್ತವೆ, ಕಾಯಿ ಕೊರೆದು ತಿನ್ನುತ್ತದೆ, ಹಾಗೆ ತನ್ನ ದೇಹದ ಅರ್ಧ ಭಾಗದಷ್ಟು ಮಾತ್ರ ಕಾಯಿಯ ಒಳಗೆ ರಂಧ್ರ ಕೊರೆದು ತಿನ್ನುತ್ತದೆ ಮತ್ತು ತನ್ನ ತ್ಯಾಜ್ಯ ಹೊರಹಾಕುತ್ತದೆ, ಹೊರಹಾಕಿದ ತ್ಯಾಜ್ಯ ಕಾಯಿಯೊಂದಿಗೆ ಕೊಳೆತು ಕೆಟ್ಟ ವಾಸನೆ ಬರುತ್ತದೆ. ಇಂತಹ ಟೊಮೆಟೊ ಮಾರುಕಟ್ಟೆಯ ಮೌಲ್ಯ ಕಳೆದುಕೊಳ್ಳುತ್ತವೆ. ಈ ಕೀಟಗಳು ಎಳೆಯ ಕಾಯಿಯಿಂದ ಹಿಡಿದು ಸಂಪೂರ್ಣ ಹಣ್ಣಾದ ಎಲ್ಲಾ ಹಂತದ ಕಾಯಿಗಳನ್ನು ಕೊರೆದು ತಿನ್ನುತ್ತವೆ. ಹೀಗಾಗಿ ಇಳುವರಿಯು ಗಣನೀಯವಾಗಿ ಕಡಿಮೆಯಾಗುತ್ತದೆ.